تفكيرك عجبني

متل كل يوم … و خاصة يوم الاثنين , بصحى بدري عشان أروح على شغلي , أول ما أوصل بعمل شاي بنفس الكاسة الي بشرب فيها دايما ” ليه ما بعرف الصراحة ” و بوجهي على الأستوديو أحضر للبرنامج الصباحي ” طلة صبح ” ترتيب الموسيقى المعتاد , و إختيار الأغاني إلي بعملي ” خلبطة أو لخبطة ” متل دايماً , بس بتعدي على خير هذه المسألة , لأني بكتشف أني بطلع بكم من الأغاني و بصير أتدلل و أختار متل ما بدي ” مش هالمشكلة الكبيرة ما بعرف ليه أعملتها قصة ” , المهم لما يبدى برنامج ” طلة صبح ” بدك تسمع كل شي من غير ما تستغرب , إلي عندوا مشكلة كبيرة و لازم تنحكى , و إلي بحكي مشكلة هو إلي بفكرها كبيرة و هي ما بنحكى فيها , و إلي بحكي مشكلة صغيرة و عارف أنها مش مستاهلة بس خلص بدوا يعمل قصة على الصبح ” من النوع إلي ما عندوا شي و فاضي عالآخر ” , طبعاً لازم نتذكر الشي الرئيسي عند الكل ” صباح و مسا ” ما بنتسى ” facebook ” , صباحووو يا جماعة ” status ” عشان لفت الإنتباه و أشوف كم تعليق عليها , خلي الواحد يعمل وضع و حركة , و الأحلى من هيك لما أعطيها “ ” sing in على msn , ما بتلحق حكي من هون و هناك , في يوم من الأيام و على الصبح ” يا صباح يا عليم يا رزاق يا كريم ” , أنعملي add من أيميل جديد , و الواضح من أسم الأيميل أنها بنت , اعملنا إضافة و طبعاً أيدي على قلبي الله يستر , حكينا … و كالعادة في بداية الحكي ” مرحبا , كيفك , ممكن ترد ” و إلي بقهر أكتر لما يبلش ال ” nudge ” بتحس انه ال ” msn ” متل باب الدار , كل ما طولت في الرد بضل يدق الباب لحد ما تفتح , طيب ردينا ” هلا , تمام , كيفك انت ” , شو فكركم الرد السريع المتوقع بالنسبة إلي ” ليه ما بترد يعني و لا شايف حالك علينا ” , بصراحة بحس أنها مرتي أو حد محسوب علي , بس شو بدي أعمل راح أسمع هالكلمة و أهضمها ” معلش بس كنت مشغول شوي ” , هلأ بنيجي للإضافة العظيمة في الحديث ” كيفك ” , لا و الله …. بتمزحي , ” الحمد لله ” , ” شو أخبارك ” , وين الصوص ؟؟؟؟ , ” تمام الحمد لله ” , ” كيف شغلك ” , ما بظن في غير ” الحمد لله تمام ” !!! , هلأ بنبلش بلغة الإشارة ” , . P: , ;) …ألخ ” و بضل على هالحالة , أما بتفكر أنها بتحكي مع ولد صغير بموت في شي أسموا صور , أو أني فجأة بطلت أستوعب إلا بالحركات , بتعرفوا شي بتخيل دايما حياتنا لو كانت متل النت , يعني لو بدي ألفت أنتباه حد بعمل nugde عشان ألفت إنتباه و يطلع علي , أو ممكن أعمل status أعلقها بكرتونة فوق راسي عشان الناس تعرف الحالة إلي أنا فيها , بس المصيبة وين بدهم يحطوا comment ” بس بدون ما تنفهم كلمة يحطوا غلط ” أو على رأي المثل ” بلا قافية ” , على سيرة ” بلا قافية ” إلي بتنحكى بعد أيا جملة ممكن لما حد يسمعها يفهمها غلط , بس بالوقت الحالي في ناس صاروا يستخدموا طريقة تانية لما الناس تفهمهم غلط , فرضاً واحد متلي حكى ” مش عارف وين الناس بدهم يحطوا …. ال comment , بتحكيلهم ” مش متل ما فكرت بس تفكيرك عجبني ” , بس أكيد هذا مجرد مثال لا أكثر , نرجع لعالم النت , لو بدنا نعمل لمة في الحقيقة يمكن تاخد منا المسألة أكتر من شهر بأقل تقدير , بالعكس على الfacebook أعمل جروب و أستنى يومين بتلاقي أكتر من 500 شخص أشتركوا في الجروب , بس الحلو بالموضوع أنه العدد الكبير الي ممكن يشترك في الجروب أما بيكون مش فاهم عن شو الجروب و أصبعوا متعود على ال Confirm , أو ما بكون فاهم اللغة إلي مكتوب فيها الجروب أصلا , أو الصورة لفتت نظروا و خاصة في الجروبات الي بالي بالك … مش متل ما فكرتوا بس تفكيركم عجبني .